ՓԱՍՏԱՉԱՓ
Խոշորացույց
Թիվ-թվանք
Տեսանյութեր
հյ
ру
en
Հանրապետական կուսակցության փոխնախագահ Արմեն Աշոտյանը Ազգային ժողովի հերթական նիստից հետո լրագրողների հետ զրույցում, խոսելով պաշտպանության նախկին նախարար Միքայել Հարությունյանի՝ 2002 թվականից Ռուսաստանի քաղաքացի լինելու հանգամանքի մասին, առաջարկեց չհարցնել այդ մասին Հանրապետականին։
«2002-ից մեր իշխանության տարիները չէին, մենք իշխանության մասն էինք, իսկ այդ ժամանակ կար նախագահական Սահմանադրություն…»,- ասաց նա՝ հավելելով, որ այս երկրում կան շատ ավելի կոմպետենտ մարմիններ, որոնք կարող են սպառիչ պատասխան տալ այդ հարցին:
Պետական կառավարման համակարգը
Հարկ է նշել, որ նախագահական լինում է ոչ թե սահմանադրությունը, այլ կառավարման համակարգը։ Ի դեպ, Աշոտյանի նշած ժամանակահատվածում պետական կառավարման համակարգը ոչ թե նախագահական էր, այլ կիսանախագահական։
Համակարգերի այս տարբերությունը հասկանալու համար բերենք օրինակ․ նախագահական համակարգի պարագայում գործադիր իշխանության ղեկավար է նախագահը, իսկ վարչապետ, որպես պաշտոն, գոյություն չունի։ Վառ օրինակ է Ամերիկայի Միացյալ Նահանգները։
Այդ տարիներին գործադիր իշխանության (այդ թվում՝ վարչապետի) ղեկավար էր երկու ինստիտուտ՝ նախագահը և Ազգային ժողովը։ Ուստի այդ տարիներին Հայաստանում գործել է կիսանախագահական կառավարման համակարգ։
Հանրապետականն այդ տարիներին չի՞ եղել իշխանություն
Ըստ Արմեն Աշոտյանի՝ ՀՀԿ-ն իշխանական համակարգի միայն մի մասն է կազմել:
Սկսած 2000 թվականից՝ գործադիր մարմնի ղեկավար էր ՀՀԿ նախագահ Անդրանիկ Մարգարյանը։ Հանրապետականին էր պատկանում նաև օրենսդիր իշխանությունը։ Այլ կերպ ասած, լինելով մեծամասնություն ԱԺ-ում և ղեկավարելով գործադիրը՝ ՀՀԿ-ն եղել է իշխանություն:
Միքայել Հարությունյանի քաղաքացիությունը ՀՀԿ-ի օրոք
«Ես վաղուց հրաժարվել եմ այն գայթակղությունից, որ դատողություն անեմ այն բանի մասին, որից ամբողջությամբ տեղեկացված չեմ, որի մասին չկան օբյեկտիվ փաստեր»,- նշում է Աշոտյանը՝ հավելելով, որ հարցը ուղղենք այն պատկան մարմիններին, որոնք պետք է այդ պարզաբանումը տան»:
2008 թվականի ապրիլի 16-ին՝ Հանրապետականի իշխանության օրոք՝ նախագահ Սերժ Սարգսյանի հրամանագրով Միքայել Հարությունյանը նշանակվել է գլխավոր ռազմական տեսուչ: Սերժ Սարգսյանը եղել է նաև Միքայել Հարությունյանի անմիջական ղեկավարը կառավարության կազմում, երբ վերջինս պաշտպանության նախարար էր:
Հավելենք նաև, որ 2002 թվականի դրությամբ Սահմանադրությունը թույլ չէր տալիս անձին ունենալ երկքաղաքացիություն, այդ դրույթը մտել է 2005 թվականի սահմանադրական փոփոխությունների արդյունքում։
Կարինե Կիրակոսյան
