Հունական «սպեցնազին» սպասելով․ Արա Պապյանի պնդումը չի հաստատվում

Օրերս Կանադայում Հայաստանի նախկին դեսպան Արա Պապյանը, խոսելով 44-օրյա պատերազմի օրերին Հայաստանին առաջարկված ռազմական աջակցության մասին, հայտարարել էր, թե մենք հրաժարվել ենք տարբեր երկրներից առաջարկված ռազմական օգնությունից, այդ թվում՝ հատուկ ջոկատայինների։

«Էդ զենքերը մեզ առաջարկվեցին, մեր իշխանությունը հրաժարվեց։ Թող չհրաժարվեր։ Հունաստանի արտգործնախարարը չեկա՞վ էստեղ։ Եկավ։ Մանրամասներ բացեմ․ առաջարկեց 1200 հատուկ․․․ սպեցնազ այսինքն, էն թվով, ինչ որ թուրքական բանակից էին կռվում։ Հիմնավորումը հետևյալն էր։ Որ եթե կարա ՆԱՏՕ-ի մի անդամ 1200 հոգի ուղարկի հատուկ ջոկատային, նույնը կարա Հունաստանը։ Ֆրանսիան չի՞ առաջարկել, Միացյալ Նահանգները չե՞ն առաջարկել»,- պնդեց Արա Պապյանը։

«Փաստերի ստուգման հարթակը» հարցում ուղարկեց ԱԳՆ՝ խնդրելով մեկնաբանել այս տեղեկությունը։

Արտաքին գործերի նախարարությունից մեր հարցման ի պատասխան հայտնեցին, որ այս տեղեկությունը չի համապատասխանում իրականությանը։

«ՀՀ ԱԳՆ-ն նման առաջարկներ չի ստացել»,- ասված էր ԱԳՆ-ից մեզ հասցեագրված պատասխանում։

Այսպիսով փաստենք, որ նախկին դեսպան Արա Պապյանի պնդումը, թե 44-օրյա պատերազմի օրերին Հունաստանը մեզ առաջարկել էր 1200 հոգանոց հատուկջոկատայինների խումբ ուղարկել, չի հաստատվում։

Ի դեպ, ամիսներ առաջ «Հանրապետություն» կուսակցության նախագահ Արամ Սարգսյանն էլ հայտարարել էր, թե ԼՂ-ում տեղակայվելու համար սկանդինավյան երկրներից խաղաղապահների զորակազմ բերելու առաջարկ է եղել, որը Հայաստանը մերժել է։ 

Այդ պնդումը ևս, ինչպես պարզվեց, կեղծ էր։

Սևադա Ղազարյան